說‧教會只不過……

紐西蘭 - Tekapo 的小教堂

說‧教會只不過……

有朋友話教會有好多信徒信仰薄弱，又唔肯投入就多多投訴(希望無誤解…)，當然係好多呢類現象出現左，而且教會好似因為咁，出現唔少問題。不過就呢個現象，我又有唔同睇法。


首先，我想再定議教會。

故會其實係藏污納垢、充斥罪人既地方！點解？因為凡相信基督、偕同基督者均為認罪之人，所以教會只係一班罪人聚集既地方。而且我地對罪係無免疫能力，我教堂牧師形容為犯罪循環、沒完沒了…我地可唔可以唔含怒到日落？會唔會一啲唔正確思想都無？我地就因為會繼續犯罪，所以先要返教堂念認罪文！

所以教會係罪犯集中地，我地有投入聚會、有事奉咁又點呢？係唔係比入嚟求學位既高尚？係唔係比因為唔認得佢憤而離開既人被稱為義？都係五十步笑百步，法利賽人唔識真道，佢地用行為用律去定一個人既高低聖俗，所有野都有批評同標準，今日香港教會就係向呢個方向走。返教會既人追求業績，例如有無事奉崗位，有無傳福音；向人展示一個所謂標準既基督徒樣式，人前人後感謝主，樣樣都要同"主"掛勾，卻忽略街外人睇既，係我地做人既表現，唔只一次聽到:口口聲聲感謝主，一樣係見高就拜…成日感謝神，做野咪一樣自私自利…道成肉身既信仰唔係用口去感謝，而係由心出發。

講左咁耐，重點係---唔應該期望教會內人人精兵，走向中產模式既美式成功神學之路，教會畸形、奇離人愈多，其實表示你教會真正切合人既需要！好人好者返教會信主，其實好簡單，但係你用信仰去令一個被人拒絕既人得到接納，呢個先係耶穌基督經常做既事。點解耶穌基督唔去搵總督彼拉多傳福音？唔係唔得掛？主親自出馬喎？咩中小學、座堂、咩都俾你喇！勁過林瑞麟！點解主又唔去羅馬傳福音？中左就成為國教喇！根本上，基督教應該係爛鬼信仰，有錢有權既人好難接受既信仰，好比駱駝穿針啊老友！！

最後，教會只不過……係咩？各自有各自既睇法，不過唔好用世界勤力、成功、投入等等去度一個信徒，度自己無問題，信仰個人化既極致都係自己同上主交代，不過我地無審核一個人夠唔夠格信耶穌，如果係加爾文信徒，由始至終都係一個奧秘，未到最後你都唔知得唔得救，成聖係一世既功夫……好辛苦……弟兄姊妹，做個快樂既信徒，睇開啲喇！