評‧回應陳敏儀女士上星期五都市日報文章
陳敏儀女士一篇有關反國民教育遊行既文章，當中提出因為政治操作、選舉既原因「真如我所顧慮，選舉來了，事情一被政治化就會變得不理性。原意是要保護孩子，現在反而是帶頭去傷害孩子，利用孩子做宣傳工具…」遊行迫令小孩子靠邊，大人又逃避責任，沒有以身作側「關係總會出現衝突，讓孩子 從父母身上，學到坦誠表達自己，學到包容和寬恕」。主流基督教會唔會都係咁諗？坦白講，愈來愈基督徒不應參與政治既呼聲。好明顯陳女士自己先將事件政治化，從一個因為選舉而出現所謂既選舉行為去睇小朋友上街。每每一講到政治就會兩極化，唔夠平衡、持平，基督教合乎中道既原則就有問題。支持政府施政如是，支持某政治人物如是，一切都係自己設局自己踩，然後就話教會不參與政治，洗手不幹逃離道德既責任。
講返呢篇署名文章，字裡行間睇到既，只係將強推國民教育既局方，與反對推行既家長、學生組織同市民，比喻為在家庭中有分歧既父母；更將彼此既分歧，簡化成人與人之間出現既衝突，要家長們要用包容同寬恕、懷抱希望，努力解難，不輕言棄，先係孩子要學習榜樣。我首先要點出，父母比喻中既錯配，緣自於雙方既不對等，如果係兩公婆，何解一方可以話行就行而唔係有相有量呢？如果真係兩公婆，真係分歧大到無法調解，可以選擇離婚，唔好害左下一代大家好嚟好去。而家呢？教育局唔係你老公，佢要用行政手段迫你就範！點傾？九萬人上街懷抱希望，而家要計劃9月3日罷課罷教……如果可以令政策撤銷，我相信大家都可以包容寬恕，大家而家就一定要不輕言棄，作小孩子既榜樣！
原文﹕(本文摘自都市日報)看到一群天真的小孩子被推在鏡頭前，舉起波板糖叫停國民教育，我憤怒了！也慶幸自己選擇了拒絕國民教育家長關注組的邀請，真如我所顧慮，選舉來了，事情一被政治化就會變得不理性。原意是要保護孩子，現在反而是帶頭去傷害孩子，利用孩子做宣傳工具，就如當年為反對正生書院遷入梅窩， 一群小孩子被安排在居民大會中去包圍正生校長，當時我在現場，心裏想：稚子何辜 ?請成年人拿出成年人的智慧去處理事情!在家庭中，父母有分歧時，也常會不自覺地以孩子作為攻擊對方的武器，例如要求孩子傳話，強迫孩子做選擇「靠邊」，把孩子置於困惑矛盾的情境中，會造成孩子的心理困擾。 關係總會出現衝突，讓孩子 從父母身上，學到坦誠表達自己，學到包容和寬恕；生命總會出現挑戰，讓孩子從你身上學會懷抱希望，努力解難，不輕言棄。
陳敏兒，資深藝人；「家長匯習」創會會長，深信家是人生的力量來源。
陳敏兒 (逢周五見報)
感‧對峙
聽到好多朋友遊行既消息，亦都有做警察既朋友講佢地知到既消息…我內心好唔舒服。我除左懷疑CY既誠信之外，我從無懷疑我朋友既誠信，心痛既係我地既政府，愈來愈識得用製造撕裂、矛盾，去令社會造成分化！
有時候係facebook見到警察既行動，我真係好嬲！點解胡椒噴霧要升級呢？點解次次都噴到咁激呢？你地話因為啲人好暴力推鐵馬，但係今次用到水牆喇，唔使咁激係唔係？仲有，遊行人數超出預期，而且每年既行程都被你地刻意拖慢，點解好似你地無責任咁既？又係遊行人士太激怕出事？
不過我都係facebook見到好多人，其實唔使向前線警務人員講咁難聽既說話，佢地真係打工，而且佢地未必同你有相同既睇法，鬧佢地做咩？佢地如果唔使睇住你地，可能同屋企人擓假去旅行，佢地同你有咩分別呢？我開始唔like辱罵警察既post……睇新聞，好多後生仔挑釁前線人員，謂…其實做咩啫？佢地出手都係接order，你係咁挑佢既底線，到佢出噴霧時你唔好叫痛，仲要連累埋無搞事果啲人！
好似各打八十大板，老實講，我真心覺得兩邊都無錯。遊行示威既權由天賦予我地，根本絛可限制；而警察維持治安，令秩序井然，我覺得天公地道。問題出係邊？就係有人令到警察要做出一啲超越其基本工作既野，例如刻意拖延遊行腳程，令中間有遊行人士有情緒或者有其他要求造成矛盾；又好似明明唔需要有咁多肢體碰撞、清場、高水馬等等明顯挑釁示威情緒既行為，令雙方未開始先興奮，製造如箭在弦既緊張氣氛，一埋牙…死得！當然最後責任唔會落係前線人員手中，因為真係有前線人員唔滿意咁既做法，但係可以點呢？政府施壓我覺得真係唔存在，因為根本警方高層自己識做，愈做愈激、愈做愈離譜。
但係遊行人士係唔係無責任呢？係無得傾既情況之下，遊行既本質有明顯既變化。坦白講，好多野都係大家協商之下產生，長毛、李卓人同警察有幾熟大家都知，因為咁多年嚟大大小小既遊行示威，都係大家有溝通地進行。唔好忘記遊行示威係要將社會淡忘或者唔記得、唔知道既事，再一次呈現社會大眾既視線之中，所以最重要係報導時候果一part，好多時衝擊一輪就真係收工。但係警方高層愈來愈惡之後，帶隊既人唔通由你令遊行示威無聲無氣？當然人民力量出現，佢地將更激烈既手法讓大眾對示威有更高既注視，亦都係令大家無得傾既原因。
最後我只係想講，點解咁多矛盾既？呢啲矛盾點出嚟架？我諗大家都會認同，我地買唔到樓唔係我地唔努力，食貴罐頭唔係我地懶，無得揀特首唔係因為我地蠢，同警察對峙唔係因為我地惡，警察對住示威人士既無奈亦唔係因為我地衰，而係我地無一個有為、盡責、有良心同由我地選出嚟既政府。
