記‧其實我想講既係……

其實係自己懶定係無時間？我個blog同"小小說"已經無updated好耐下……

又可能fb太方便(當然你可能會話fb too old…instagram、Tumblr我都有用…)，我發現自己除左想講一大段嘢之外，我真係的唔起心肝搞blog…另外，出blog既時候，自己會自我修正改用"書面語"，想係想其他非廣東話、粵語地區既人都睇得明…但係你有咁既客路先講喇……

我好想話，當你返一份工要求你唔好諗太多，個腦自自然然會腦閉塞，久而久之就會麻木…當然唔係個個都係咁，我諗太多都唔出奇…少左時間用腦，結果就係用唔到！對事物麻木，有時未必係壞事，只係我唔適應，硬係對自己好陌生…粗口、笑、維持精神狀態既興奮，係令自己忘卻失落同鬱結既止痛藥，病你唔死、但唔斷尾，抗藥性愈來愈強，最後藥石無靈……

有病醫病，病假仍然電話不斷，可能係你有能，可能係其他人無能，肯肯定有人正能量谷上樣……收到面試電話唔一定成功，都係一種安慰。前面濛濛一片，點樣好呢？咁就快一年喇，朋友，呢一年我學識唔少嘢。

記‧路姆西

其實在我於我來說，什麼弱化抗爭、令抗爭成為炒賣，這些事情我都不關心…香港人就是有香港人自己的style，炒賣或者跟風就是我們的style，why not? 如果大家都知道這一隻公仔的名字、又知道他第一次"飛身出場"的典故，我告訴你﹕其實搶購「路姆西」都是政治！少扮知識文藝青年跟炒賣分割，可能你只是酸買不到公仔的葡萄！

不過搶購事件，令我想起前捷克作家總統哈維爾喺《無權勢者的力量》中所描繪的賣菜大叔，在自己的店前掛起「全世界工人階級團結起來」的橫額。大叔只想用一張他自己也不相信的"謊言"，去表示自己不想生事、忠於安定、只想平平靜靜過日子。哈維爾道出被壓迫的人民，只能相信謊言、以謊言求生的無奈，用沉默去回應不公義既政權，可是變相鞏固了這個爛政權。香港人已經醒過來，知道沉默就是政府的幫凶，朋友…親政府的一派都在用"幫港出聲"、"沉默之聲"來為組織命名，代表了支持政府的人都知道，香港大部份人---包括家庭主婦都知道這個特區政府暨不公義、又欠缺代表性，除了仍然合法之外，這個政府根本不應該存在！人人搶購路姆西，可能有部分人貪玩、部分人謀利，但只要有小部分、甚至極小部分人是因為政治目的而買，我們這個社會都已經改變了。大家耐心的看吧！香港原本就是由一班貪生怕死、貪威識食、享樂至上、無根的移民組成的啊！香港的社會改革，為何不可以由買路姆西而開始呢？

銅鑼灣宜家「路姆西」售罄 有人狂掃15隻

http://hk.apple.nextmedia.com/realtime/news/20131209/51977138
文章分享﹕活在真誠磊落中
http://www.vjmedia.com.hk/articles/2012/08/27/18503

有人一口氣掃下15隻路姆西。（李忠浩攝）(蘋果日報)

記‧萬千熄機賀台慶…你今日睇左未？

收到facebook 消息，話某大機構內部email向員工施壓，令同事要無記電視大壽當晚開電視，因為節目收視過30點，機構就會有額外資助。老實一聽先係嬲、再而思考、三而冷靜分析，根本就係笑料，不過笑都係苦笑。

呢單新聞兩大可笑既地方。第一，無記電視做乜無端端捐錢先？因為"叻哥"既賭局？為左洗底？貴為香港第一大台，唔明佢地點解要咁做。機構今次可以話來者不拒，有人送錢俾佢地洗，當然無問題喇。咪住…真係無問題？無記想催谷收視，叫人睇電視、睇佢地，本身用錢"收買"觀眾，本身既行為唔使討論，一定唔公義既地方。如果個節目係歡樂滿XX、XX歡樂傳萬家又唔同，本身係叫人籌款，睇完節目之後更認識機構，鼓勵人做善事、做好心；而家個台慶，搵班人出嚟表演做個電視台做壽，有何教育意義？對社會服務有咩幫助？機構接受咁既形式資助，真係好可笑。至於點解只得咁少機構受助(七間有合作開既機構)，係唔係另一種霸權，就按下不表喇……

第二，其實機構用email命令員工去睇電視、院舍中心要睇無記，仲好笑！其實全香港人熄機，只要800戶有參與收視調查既用戶有睇，仲要睇無記電視台慶，咁"萬千熄機賀台慶"都係會失敗收場(而家都唔可以話成功，關鍵仍然係800戶)。你去幫人谷收視，根本就無用麻……而家就變左做多左，令機構尷尬之餘，成為業界笑料。所以我好肯定咁話，呢次事件一定係有人自以為事而引起，最高層同無記根本唔會向佢地施壓，呢個層次既管理人員今次失手，只係一個平日工作態度既反映，突顯中層管理人員手執雞毛指點江山既醜態。

事件其實亦都將好多機構喺社福一筆過撥款之後，開始出現聚財、斂財既劣根性反映出嚟。一筆過撥款之後，政府不斷削減開支，不斷又開新服務去滿足服務需要，結果係各大小機構出盡法寶為求生存，減人工、設半職甚至0.35社工位去請人；為左服務地盤私下分贓，山頭主義及霸權意識橫行，根本就令社會服務成為另類戰場。如果政府全資助既話，機構使唔使為左幾十萬(300萬N個機構分…唉…)咁肉酸呢？機構仲要有好多財政儲備，但係有錢點解唔要？老友，商業世界既邏輯套用喺社福，為何你既人工又唔係多勞多得？

萬千熄機既行動，係一個自發而無實際效果既行動，但係好多人開心左，呢個係事實。好多朋友無無聊開住電視，藉住今次機會相約朋友聚舊，甚至為左逃避電視去做一啲平時唔會做既事，例如集體打波、落街跑步、請阿爸阿媽出街食飯……呢個反思，由HKTV申請牌照失敗開始，去到反思選擇權既問題，其實都係一次公民教育既好例子。我地唔需要迫自己去接受唔啱食既嘢，同時我地都唔會迫自己去做唔想既事，何解我地會迫自己去睇唔想睇既節目呢？我地更加唔想迫自己去接受一個凡事與民為敵既首長官員！


某機構既新聞﹕
http://news.mingpao.com/20131120/gba1.htm

機構回應﹕(回得幾得體……)
http://hk.apple.nextmedia.com/realtime/news/20131120/51919810

收視新低…相信未能完全反映現實……

無記…真係呢……好嘢！咁又得左，洗左底架喇……

記‧我不討厭政治政治

我不討厭政治政治。而且我覺得個社會應該多元化。只係我咁大個仔都未經歷過好似而家咁對立、沉默由多數變少數既社會形態。MenClub一段近乎發牢騷既文章，引起一次不少既討論。當中有人撐版主﹕成功須苦幹，唔得唔好懶政府，無樓都可以結婚，上一代都係咁，湊大幾件都仲得。另一班人點出政策失衡、政府失敗，想努力咩、一世都上唔到樓，出幾句鬧政府又有錯咩？

兩班人有都啱。你咩都唔做，靠政府養就真係有問題。事事講享受，但又怨無樓係唔可取既行為。之但係80後未畢業先有大筆借貸待還，人工同70後出嚟社會時差唔多，你有得享受啫，老友新一輩就有排受……而家環境政府又係唔係全無責任？(好笑既係樓價高，有人賴美國佬量化寬鬆…唉…睇多尐文先喇…)

我個人認為你好努力都上唔到樓，原因唔會只有一個。大家講既都無咩問題，最大問題係﹕MenClub係睇圖(所謂J圖唔明問隔離果個)、講玩講食既討論區(forum)，但原來大家都有政治既觀點。689令社會分化，同時令好多"裝睡的人"開始醒覺。特別係成日話唔好講政治既人，其實佢地已經參與政治既討論。你不能夠拒絕呼吸，政治就是空氣。

原文在此---香港人既風骨去左邊？
http://blog.menclub.hk/yungchoi/2013/11/18/%E9%A6%99%E6%B8%AF%E4%BA%BA%E6%97%A2%E9%A2%A8%E9%AA%A8%E5%8E%BB%E5%B7%A6%E9%82%8A%EF%BC%9F/

就係呢張圖。(編註﹕呢張絕對不是J圖……)

小小說‧神經伴侶008

小小說‧神經伴侶008 番外篇﹕Henry & Joey

Henry是Jolly的同事，一年前Joey太太患病，而且病情反覆。三個月前到醫院檢查時，得知病情轉危急需進行手術治療。Henry很擔心，倒是天性樂天的Joey反過來安慰他。

「今天帶了湯水來，是外母大人為你煲的，她就是不相信我也能煲得好…」Henry有點不忿的說。「哈哈，你可知道我家可是一個大定族，而本小姐更是家中最小的千金！你外母大人親自動手給我煲湯，而不是假手印傭姐姐來煲，就知我得寵吧。」Joey進行手術已經超過一星期，今天精神很好呢。「我當然知道…當初跟你回家拜見外父外母兩位大人時，就是洗碗筷，跟你幾位姐夫一起洗，也要一個小時！……對，三姐跟五姐說明天會來探你，明天你不會寂寞就是。」「是嗎？我可不想聽五姐說她奶奶的不是，我倒有點掛念奶奶就是……」「媽媽離開我們也差不多三年了吧…當初在醫院望著消瘦的她……」Henry眼泛淚光的說。Joey慌忙的說「"夫君"是我不好！不要哭出來好不好……」

就在她們打情罵俏的時候，隔鄰的一對夫婦卻顯得過份安靜的說。特別是男的雙手按在膝蓋上，兩臂因為支撐著身體的重量，正在抖震不已。女的吃著丈夫為自己切好的蘋果，一口、一口的送進嘴裡，可是你不能從平白的表情中，看出她是喜是悲、雙目惘然。Joey悄悄的跟Henry說「那位太太最終也敵不過病魔……她要做"那個"手術了，丈夫在知道後，一直也是低著頭，說話比從前更少，就這樣坐下來一言不發……」「或許…他很想要小孩子吧，我看他們比我們年輕，上天也……」「Henry，你有想過要孩子嗎？」Joey突然問Henry「…什…什麼？…孩子嗎？……」「有沒有？」「年輕時曾經想過……可是…生下來問題太多，處理不了…我們不是說了不要小孩嗎？」Henry認真的說。Joey申出舌頭來「哈哈，跟你開玩笑吧了！反正…現在想要也太老了，都快四十歲麻………而且想要，也不可能了！」「……傻瓜，說什麼傻話來！你好好休息就是，再胡思亂想我就…」「你會怎樣？你可要小心我媽不放過你！哈哈哈……」看到Joey再一次笑出來，Henry才放心下來。

「要走了…」「對，要走了…」「明天我會晚上才來，午飯前有會議麻…」「就是跟你說中午不來也可以…」「我放心不下，而且才三個鐵路站而已…」Henry別了Joey，一個人走進鐵路站、上車回公司去。在車上吃東西從來都不對，平常Henry最厭惡乘客吃東西，包裝紙隨處丟的更可惡。可是Joey入院後，Henry為了節省時間，很多時候都會在車上啃麵包。今天在啃麵包的時候，他想起小時候跟媽媽在車廂內聊天的種種，對面坐著一對母子，孩子的名字也叫Henry。

PS.有朋友正在手術後康復中，為你們禱告，早日康復！

界外球‧阿仙奴你郁手喇！

唉，阿仙奴今年買人真失敗，咁耐都係簽左個辛洛高(Yaya Sanogo)
咁大把！爭乜野蘇亞雷斯(Luis Suárez)吖，嘥氣…如果我係雲加，我就會郁手簽呢四個人﹕ 文迪蘇傑(Mario Mandžukić)、費蘭尼(Marouane Fellaini)、艾殊利威廉斯(Ashley Williams)同告魯爾(Tim Krul)！文迪蘇傑失寵之下平靚正、價錢有得傾，而且有身材把握強，好過搞左半日仲要四千幾萬英鎊都搞唔掂既牙擦蘇！而費蘭尼同艾殊利威廉斯，根本就係醫兵工廠無腰骨同無中堅既問題。特別華美倫受傷，要多一個國腳級既中堅，對輪換同應該停賽少傷十分重要。而喺咁多個龍門無個穩定，係時候入手，我推薦荷蘭門將告魯爾，佢真係好穩定年紀又輕得25歲，係好值得投資既球員。當然巴西既班納特(Bernard Anicio)值得試，不過而家不缺"幼齒"，係中生代不足……唔想見到沙格拿建功…為對家，請雲加你郁手！

PS.我好想講紐卡素，可惜……佢地仲衰過兵工廠，無嘢好講！

艾殊利威廉斯(Ashley Williams)…好大隻！

文迪蘇傑(Mario Mandžukić)係拜仁捧盃功臣之一！

蘇亞雷斯(Luis Suárez)上年最叻，係咬人！

辛洛高(Yaya Sanogo)世青盃正選，希望在明天……

班納特(Bernard Anicio)波圖截糊…可惜嗎？ 

費蘭尼(Marouane Fellaini)+阿迪達(Mikel Arteta)=強硬中場

如果"喜鵲"無左告魯爾(Tim Krul)…唉……

記‧你知佢苦衷，你唔好咁激動

有網民說：「我是一名父親，我也有兒子，若我的兒子化身為該老師的行為，而挑戰的，是父母、是老師，校長閣下，各位該校老師，包括呢位所謂的老師，應如何教育、指導呢？」

其實網上既呢個網民犯左個大錯﹕以父母比喻警察。仔女用粗口鬧你，你要諗佢為乜鬧你，佢鬧已經係一個訊號，唔用粗口就唔做教？同樣，如果林老師唔用粗口，係唔係無問題呢？根本問題已經因為咁失左焦！針對係有青關會搞法輪功，唔係個老師…就算老師講粗口，件事係唔係因為粗口而無數先？片段開頭更有女青關人士大叫非禮！好搞笑……

第二佢錯係警權不可挑戰一項。如果警務人員無誤論存在，根本唔使警監署喇！我信大部份警員用心工作，但係有部分政府介入既事情上，大家無計傾！矛盾唔在粗口，而係各有立場，而無一個共同處理既空間既問題。敢問該網民有無睇完全部片段？問題係個白衫大sir嚟之前，林老師同警員之間既口角，再加上一粒花師姐既態度，根本註定出事。最後大大聲講野既警員攞尾彩，寸林老師一段，明顯挑釁老師更屬多餘。大sir可能心諗，咪叫X左你地唔好同人嘈囉，又上YouTube喇！警員難做，如果你知佢苦衷，你唔係需要感動，唔好咁激動就可以。

都係果句，回歸以嚟，呢期警民衝突同兩方既對抗意識，真係令人傷心，相煎何太急…而政府無能同政治干預，令人感到討厭！你討厭政治，但好似大球場一樣，樣樣都係政治！

PS.有片有真相，大家自己睇左先！

記‧陳生信主記之勿論斷人

就陳生信主，又犯官非，產生好多不同討論，很多基督徒朋友（我實難以弟兄姊妹相稱）的理據相當薄弱，甚至令人覺得信主之人多為反智不講理，講不過人出聖經但又知啲唔知，有的更是教會長執傳道牧者！

在下沒受過系統神學訓練，但自問對基本教義有少少認識。敢問是否信了主，所有人犯所有事都應被原諒？我認為對應被原諒。可是，其人亦應就其行為負責，如面對法律制裁。但很多人就陳生一案發表的言論，往往說新造的人舊事已過，但陳生在過犯已成之後，並沒有就偽造遺囑一事認罪，更甚的是在沒有新證據之下，公開私人片段以證明其不合邏輯之歪論（六十歲仍可生產？陳生未信主，應跟撒拉無關）。你信主了，仍為風水怪談之說的舊我辯護，那你信的主是誰？我不討論陳的主是誰，我沒資格，但我可批判他，就一個人而言的無恥！

但林以諾如何說？他不但沒有就有錯不認作出勸導，更叫人不可論斷弟兄，而森美何基佑之流更附和其言！

最後，林以諾對蘇絲黃同性關係的雙重標準，對陳振聰的過份包容甚至無視其非，到梁振英對貧窮之解讀的認同，林以諾請好自為之。

PS.按他們的謬論，政治人物信了主，就不可以論斷嗎？689信主就麻煩了……

睇一次鬧一次既訪問…跪低唔係政棍專利，神棍都可以！

浸禮浸到好似神打一樣，果然非一般信徒…所以祈禱兩秒搞掂……

記‧造數

記‧造數

有時唔係話科學化既準則唔好，合理地要求數據亦好合理，只係邊個夠膽話自己最合理先？你唔係要出球場前一人一貼紙報數？行行下走左計唔計？中途加入又點計？遊行人數點都唔會係入球場睇波咁入場就計得到既數喇學者大哥！

你話人地造數，好就當造數喇，N年前都知係造數喇！咁又虛耗左啲乜呢？好多人都只係藉大會扯頭纜，有地方計人頭出發，根本就係自由意志叫佢地行，包括我。咁大會話幾多咪幾多囉，同六四一樣，大家唔會覺得咁有啲乜。

學者大哥只係一個線路---有人挾民意自重。老友，好out呀！當香港公民社會民智未開咩，議會好多人都唔信，會信民陣幫我地發聲？等人去救我地呀？你自己講呢堆嘢只係想曲線批佔中，好肉酸。

你點睇？

是次晚會缺席

六四晚會，我將缺席。我沒有忘記，只是晚會的形式與內容令我困擾。明天返早，晚安！