記‧撒嬌的春嬌

記‧撒嬌的春嬌

我保證大陸出盡全國之力，都拍唔出《撒嬌女人最好命》！

本來今日好期待去坐摩天輪，因為AIA爆多人，一班人唔想入去迫，就算到左門口都係返轉頭。有人諗起不如去睇戲。卡通唔係人人啱，太dark又唔啱朋友一齊睇(仲要吃晚飯㗎，dead air)，最後人畜無害底下，大伙於是揀左睇 《撒嬌女人最好命》。

起初知道演員班底差唔多全部大陸人，真心講：唔大期望。一開頭睇，節奏好彭浩翔，你話快咩又唔算，但係一開波就嚟重點：黃海棉(蛋糕)有女朋友，但不是周迅。跟住就嚟爆第一個爆笑位｢兔兔｣(有心睇就唔好search，但真心好笑)。

之後隔唔係好耐就有笑位，節奏keep住去。上次《春嬌與志明》有粉紅色乳頭，今次怕你大陸人唔明，整個血滴子過你……中段又嚟個旅行，製造場景發展劇情(老實講，又係咁)，兩條女打真軍，男主角又諗起啲嘢，加首大路情歌，今次係<突然好想你>……結局我唔使透嘢，完。

不過睇完之後，有一個好大既感覺，就係大陸就算傾全國之力，只要個編導班底唔係用香港人(就算唔係彭浩翔，我估都唔會太離譜)，佢地一定拍唔到呢算味道：港產味。你細心聽，全套片入面既對白精彩到呢，如果用廣東話，仲絕！如果有配音版我一定睇多次(唔係網上睇，入戲院呀！)！當中無牽涉太多地方色彩，開口埋口上海乜乜乜，我連一句上海話都聽唔到……反而隋棠真係台妹既代表，全情無生硬既自然姣，仲有地區代表性。而當中無刻意用文化差異或者地區局限做笑料，你可以話可惜，畢竟上海人一定有一啲集體回憶，一齊讀書既回憶碎片化得嚟，有啲假。但係上海既集體回憶，香港人識條鐵咩！所以無又唔算係啲乜。而無係上海主要景點拍，我個人拍手掌叫好，頂你，拍旅遊特輯咩(台灣都係係咁意影幢101咋)！

最後你問我好唔好睇，我覺得還可以，特別講話男女之間既好朋友，好多時都係有傾慕成份，而以輕鬆小品行先愛情元素反成次要既 《撒嬌女人最好命》，寫兩個人感情方面，就真係太少；海棉蛋糕突然討厭撒嬌，亦都太突然，欠鋪排到會覺得無說服力。感覺上周迅個角色幾正，女漢子得嚟，其實都好想人錫，同春嬌幾似，所以成套戲就似春嬌學撒嬌，亦都同大部分香港女仔好相似(唔係講港女，唔該)。不過，入到場放低百零錢笑粒零鐘，彭浩翔仍然有吸引力。最後要提周迅個friend，做得好鬼正，叫咩名呢？

記‧其實我想講既係……

其實係自己懶定係無時間？我個blog同"小小說"已經無updated好耐下……

又可能fb太方便(當然你可能會話fb too old…instagram、Tumblr我都有用…)，我發現自己除左想講一大段嘢之外，我真係的唔起心肝搞blog…另外，出blog既時候，自己會自我修正改用"書面語"，想係想其他非廣東話、粵語地區既人都睇得明…但係你有咁既客路先講喇……

我好想話，當你返一份工要求你唔好諗太多，個腦自自然然會腦閉塞，久而久之就會麻木…當然唔係個個都係咁，我諗太多都唔出奇…少左時間用腦，結果就係用唔到！對事物麻木，有時未必係壞事，只係我唔適應，硬係對自己好陌生…粗口、笑、維持精神狀態既興奮，係令自己忘卻失落同鬱結既止痛藥，病你唔死、但唔斷尾，抗藥性愈來愈強，最後藥石無靈……

有病醫病，病假仍然電話不斷，可能係你有能，可能係其他人無能，肯肯定有人正能量谷上樣……收到面試電話唔一定成功，都係一種安慰。前面濛濛一片，點樣好呢？咁就快一年喇，朋友，呢一年我學識唔少嘢。

記‧未夠七年攞綜援

我既睇法好簡單，將最有需要既俾最有需要既人。而需要應該由執行部門去處理、分流同監管。一直以嚟社會保障部都係扮演呢個角色。

另一方面合乎憲法既事情，大家都得遵守，甚麼港人優先、本土利益行先都係離題，當你批准一個人移民香港，佢地就有受香港法例去保障佢地既權利同自由，不論係唔係華裔。而居港七年先可以享有同一樣既保障，呢個係有問題既，即等同有二等公民。

講到呢到大家要有個概念﹕入境、移居香港、確定身份等工作係入境處負責，即審批權係喺入境處果處，只係真正話事人唔係佢地，係喺個每日限額處。針對呢個問題，我當然希望可以奪回話事權喇！但係入左"香港席"既人，佢地就算點樣令個社會資源減少，都係無可奈何---因為佢地係"香港人"就要享有"香港人"既權利。唔可以一時就提治治，一時就話法院有問題，終審法院係依法辦事，我唔會質疑呢一點。

最後，當然未夠七年既都可以攞，梗係會多左人攞喇。之但係用酌情權用緊既，係有咁既個案。即係…不嬲都用緊架喇！唔使大驚少怪！反而打假既情況又如何呢？我反而關心。以前成日接觸學生家長，而家直頭親眼見到，好多人---本地土生土長既"香港人"，真係唔使做生幾個！佢地明明有能力，但係選擇唔做…咁係你既選擇，我唔係資本主義信徒，你唔做我奈你唔何…但係我想講，保障部會唔會真心去check每一隻case呢？特別係日日好勤力返工，同時又有綜援既能人！佢地月月雙糧，可能快過你買樓！

好正，雖然我唔太認同呢種睇法，但係話你知，抗拒強國人至全盤否定既人…係主流！

記‧路姆西

其實在我於我來說，什麼弱化抗爭、令抗爭成為炒賣，這些事情我都不關心…香港人就是有香港人自己的style，炒賣或者跟風就是我們的style，why not? 如果大家都知道這一隻公仔的名字、又知道他第一次"飛身出場"的典故，我告訴你﹕其實搶購「路姆西」都是政治！少扮知識文藝青年跟炒賣分割，可能你只是酸買不到公仔的葡萄！

不過搶購事件，令我想起前捷克作家總統哈維爾喺《無權勢者的力量》中所描繪的賣菜大叔，在自己的店前掛起「全世界工人階級團結起來」的橫額。大叔只想用一張他自己也不相信的"謊言"，去表示自己不想生事、忠於安定、只想平平靜靜過日子。哈維爾道出被壓迫的人民，只能相信謊言、以謊言求生的無奈，用沉默去回應不公義既政權，可是變相鞏固了這個爛政權。香港人已經醒過來，知道沉默就是政府的幫凶，朋友…親政府的一派都在用"幫港出聲"、"沉默之聲"來為組織命名，代表了支持政府的人都知道，香港大部份人---包括家庭主婦都知道這個特區政府暨不公義、又欠缺代表性，除了仍然合法之外，這個政府根本不應該存在！人人搶購路姆西，可能有部分人貪玩、部分人謀利，但只要有小部分、甚至極小部分人是因為政治目的而買，我們這個社會都已經改變了。大家耐心的看吧！香港原本就是由一班貪生怕死、貪威識食、享樂至上、無根的移民組成的啊！香港的社會改革，為何不可以由買路姆西而開始呢？

銅鑼灣宜家「路姆西」售罄 有人狂掃15隻

http://hk.apple.nextmedia.com/realtime/news/20131209/51977138
文章分享﹕活在真誠磊落中
http://www.vjmedia.com.hk/articles/2012/08/27/18503

有人一口氣掃下15隻路姆西。（李忠浩攝）(蘋果日報)

記‧萬千熄機賀台慶…你今日睇左未？

收到facebook 消息，話某大機構內部email向員工施壓，令同事要無記電視大壽當晚開電視，因為節目收視過30點，機構就會有額外資助。老實一聽先係嬲、再而思考、三而冷靜分析，根本就係笑料，不過笑都係苦笑。

呢單新聞兩大可笑既地方。第一，無記電視做乜無端端捐錢先？因為"叻哥"既賭局？為左洗底？貴為香港第一大台，唔明佢地點解要咁做。機構今次可以話來者不拒，有人送錢俾佢地洗，當然無問題喇。咪住…真係無問題？無記想催谷收視，叫人睇電視、睇佢地，本身用錢"收買"觀眾，本身既行為唔使討論，一定唔公義既地方。如果個節目係歡樂滿XX、XX歡樂傳萬家又唔同，本身係叫人籌款，睇完節目之後更認識機構，鼓勵人做善事、做好心；而家個台慶，搵班人出嚟表演做個電視台做壽，有何教育意義？對社會服務有咩幫助？機構接受咁既形式資助，真係好可笑。至於點解只得咁少機構受助(七間有合作開既機構)，係唔係另一種霸權，就按下不表喇……

第二，其實機構用email命令員工去睇電視、院舍中心要睇無記，仲好笑！其實全香港人熄機，只要800戶有參與收視調查既用戶有睇，仲要睇無記電視台慶，咁"萬千熄機賀台慶"都係會失敗收場(而家都唔可以話成功，關鍵仍然係800戶)。你去幫人谷收視，根本就無用麻……而家就變左做多左，令機構尷尬之餘，成為業界笑料。所以我好肯定咁話，呢次事件一定係有人自以為事而引起，最高層同無記根本唔會向佢地施壓，呢個層次既管理人員今次失手，只係一個平日工作態度既反映，突顯中層管理人員手執雞毛指點江山既醜態。

事件其實亦都將好多機構喺社福一筆過撥款之後，開始出現聚財、斂財既劣根性反映出嚟。一筆過撥款之後，政府不斷削減開支，不斷又開新服務去滿足服務需要，結果係各大小機構出盡法寶為求生存，減人工、設半職甚至0.35社工位去請人；為左服務地盤私下分贓，山頭主義及霸權意識橫行，根本就令社會服務成為另類戰場。如果政府全資助既話，機構使唔使為左幾十萬(300萬N個機構分…唉…)咁肉酸呢？機構仲要有好多財政儲備，但係有錢點解唔要？老友，商業世界既邏輯套用喺社福，為何你既人工又唔係多勞多得？

萬千熄機既行動，係一個自發而無實際效果既行動，但係好多人開心左，呢個係事實。好多朋友無無聊開住電視，藉住今次機會相約朋友聚舊，甚至為左逃避電視去做一啲平時唔會做既事，例如集體打波、落街跑步、請阿爸阿媽出街食飯……呢個反思，由HKTV申請牌照失敗開始，去到反思選擇權既問題，其實都係一次公民教育既好例子。我地唔需要迫自己去接受唔啱食既嘢，同時我地都唔會迫自己去做唔想既事，何解我地會迫自己去睇唔想睇既節目呢？我地更加唔想迫自己去接受一個凡事與民為敵既首長官員！


某機構既新聞﹕
http://news.mingpao.com/20131120/gba1.htm

機構回應﹕(回得幾得體……)
http://hk.apple.nextmedia.com/realtime/news/20131120/51919810

收視新低…相信未能完全反映現實……

無記…真係呢……好嘢！咁又得左，洗左底架喇……

記‧我不討厭政治政治

我不討厭政治政治。而且我覺得個社會應該多元化。只係我咁大個仔都未經歷過好似而家咁對立、沉默由多數變少數既社會形態。MenClub一段近乎發牢騷既文章，引起一次不少既討論。當中有人撐版主﹕成功須苦幹，唔得唔好懶政府，無樓都可以結婚，上一代都係咁，湊大幾件都仲得。另一班人點出政策失衡、政府失敗，想努力咩、一世都上唔到樓，出幾句鬧政府又有錯咩？

兩班人有都啱。你咩都唔做，靠政府養就真係有問題。事事講享受，但又怨無樓係唔可取既行為。之但係80後未畢業先有大筆借貸待還，人工同70後出嚟社會時差唔多，你有得享受啫，老友新一輩就有排受……而家環境政府又係唔係全無責任？(好笑既係樓價高，有人賴美國佬量化寬鬆…唉…睇多尐文先喇…)

我個人認為你好努力都上唔到樓，原因唔會只有一個。大家講既都無咩問題，最大問題係﹕MenClub係睇圖(所謂J圖唔明問隔離果個)、講玩講食既討論區(forum)，但原來大家都有政治既觀點。689令社會分化，同時令好多"裝睡的人"開始醒覺。特別係成日話唔好講政治既人，其實佢地已經參與政治既討論。你不能夠拒絕呼吸，政治就是空氣。

原文在此---香港人既風骨去左邊？
http://blog.menclub.hk/yungchoi/2013/11/18/%E9%A6%99%E6%B8%AF%E4%BA%BA%E6%97%A2%E9%A2%A8%E9%AA%A8%E5%8E%BB%E5%B7%A6%E9%82%8A%EF%BC%9F/

就係呢張圖。(編註﹕呢張絕對不是J圖……)

記‧就學位問題之我見

 我個人就學位問題有以下想法﹕(利申﹕不過本人未有小孩…吹水咁吹！)

1. 就幼稚園入學問題成商業活動，家長可以考慮以學校為遊說甚至施壓對象，首先減低商業活動既出現。由於有大陸雙非羨慕香港良好教育制度，用各種方法來港產子，以致可以得到教育機會。不過佢地又用天朝模式，用錢解決錢可以解決既問題，產行代排隊既一條龍中介服務---其實就係來港產子一條龍既延伸。即係好多排隊既人，本人並非家長而係代打者，佢地有組織咁去排隊、攞表，明顯就係令人龍無理變長既原因。我會問佢地憑咩可以攞到表呢？重點﹕就係學校派表，根本就係無做任何審查！如果人人都可以攞表，咁如何保障學童得到應有既機會？雙非都有佢既機會，本土學童都有佢既機會，但係你都幾十歲又無仔女，你令其他人無左機會，唔得囉！所以要用行動迫使呢個咁荒謬既現象出現！

2.第二我個人覺得本土優先係唔可能，因為你好難係政府唔支持之下，將雙非剔除出入學制度之下，呢類訴求只會徒勞無功。但係學校把關成為關鍵！雙非家長嘈得最勁係廣東話面試問題，呢個正正就係優勢！咩要同內地接軌，要提早學識兩文三語，如果係buy呢套，咁你就係放棄自己天生擁有既優勢！(而且有好多報告講左，早學未必早著數，最大既得益係父母開心左，覺得仔女叻左、自己俾最好既佢…虛榮啫…)廣東話優先點解唔得？如果學校唔就佢地雙非人，咁就算你點排隊都死喇！咁就真係本土優先，如果佢地放下自尊去講廣東話，而唔係天朝話，我地成功左第一步---佢地開始學做香港人麻！

3.因為有商機，有人開私人托兒所、補習班，我唔抗拒既，只係港難當前，係雙非人搶灘既時候，我地係唔係俾佢地賺"戰爭財"呢？用行動施壓政府修例，如果有留者服務既，6人以上先管，係唔係太寬鬆？而社福機構可括免外，私人謀利既你唔理，其實無可能！(其實可唔可用消防條例去跟進呢？有識之士俾下意見！)同埋本地托兒服務有限，好多私人湊仔服務出現，只係太貴或者無人做到配對，如果有發牌制度，由政府成立發牌制度，行唔行得通？社工註冊召咁得閒，佢負責發埋第三、四種牌喇不如！(托兒所/托兒服務都係社會工作！)

好辛苦！為左小朋友好？我唔識答……

老老實實，用排隊人數估算，真係有咁多適齡學童？

唉，識叫人唔好亂排、你可唔可以唔亂派？學校多走一步，會唔會更好？

記‧舉步維艱

重看2012年的照片，有很多願望已經成真了，有更多的夢想在及夢中，幸而身邊很多朋友支持著，至今仍然是我生命上的一大動力。當然家人的支持比一切更重要。曾經獨自生活的經驗很寶貴，有很多東西沒有經驗過你永遠都不會知道真相……

現實很殘酷，所遇到的事到現在，有部分仍然消化不了，有的仍耿耿於懷，到夜深人靜的時候，有些時候仍然會落淚。笑說上帝是不是放假了，面對很多事情都感到很困難很困擾……下星期會處理其中一件事情，要預備的東西都已經預備好，擔心的事情已非我所能控制。這個星期又收到另一個挑戰，感覺像是沒完沒了……身邊人也受夠了吧？情緒的波動我也很痛苦，今天總算平復下來。俗語說「難關難過關關過」，我想我會吉人天相的！將事情交托上主，努力的去找資料、找援助，我想這段時間的清閒，也許是件好事，不過太清閒的話，開不了飯！相中的自己騎在沙灘上，舉步維艱的迎難而上，為我拍下照片的好友，真箇有想像力和創意，拍的時候可能還不知道成了我的鼓勵呢！

各位晚安！

PS.請弟兄姊妹為我禱告，工作、面對的事情……

界外球‧"買人"不是萬靈丹？！，阿仙奴vs熱刺後記

抽一抽大主教水:"買人"不是萬靈丹？！雖然熱刺用左差唔多1億鎊去買人，但係踢法、路數上，我睇唔到有咩改善，相反無左巴利既熱刺真係一隻無牙老虎！阿仙奴免費簽法明尼好正確，佢可能掂波唔多，但係勤力走動、波到人到之下，有感染力架老友！而重點係成班波都熟、有好強向心力面對逆境，最後果十零分鐘熱血到呢……

但係而家只係季初，熱刺新兵未上力，但係半季之後先見真章，而且兵多糧廣之下，我個人認為走出巴利陰影，唔係無可能。不過踢法上過於機動而失左靈性，係熱刺既弱點，好多時睇到熱刺死去死做，進攻真係唔夠立體，打左大半場都係被阿仙奴睇住嚟踢，波真係唔係一味湧就work架老細。不過入手拉美拿、艾力臣，明顯就係想在多啲打法上既改變，只係佢地要經得起英超既洗禮，睇住喇熱刺對維拉、史篤城同韋斯咸，一定好好睇！

而兵工廠傷左差唔多5個正選，傷患之後等於入左幾個新人咁滯，之不過質素上又係唔係夠料呢？老實講前鋒既質素真係麻麻，把握力高既普多王子唔善群體戰，身體質素高既基奧特狀態飄忽，禾確特未"到"好多波都唔係處理得宜，張伯倫得個快字，賓特拿踢後衛架！耶耶…提都唔想提，借俾人練下先喇……所以當務之急，係入手前鋒or進攻型中場(曉入波果隻、做波既唔使喇…)。防中當然歡迎喇，法明尼係萬金油，我估雲加預佢打閘多啲，中場又可以撐幾場咁，但係呢度"中牆"太重要喇，阿迪達未出嚟之前、甚至同佢同場都好，要入手喇。後防呢…我又覺得曼城都唔急，兵工廠真係仲可以既，哈哈哈！不過買人之事，事在必行！

圖片來源﹕
http://www.sbnation.com
http://www.bbc.co.uk/sport/football/teams/arsenal

韋舒亞又傷…有啲擔心佢好唔返！

唐辛波底唔錯，衰在"獨"同"死去"，基比斯呢場中規中矩喇…

CCC尼(哈哈，佢個名真係咁！)呢幾場都唔錯，雲加又可能唔買龍喇！

快腳一篤，基奧特唔做Sam哥衝上雲霄，做返射手！

小小說‧神經伴侶008

小小說‧神經伴侶008 番外篇﹕Henry & Joey

Henry是Jolly的同事，一年前Joey太太患病，而且病情反覆。三個月前到醫院檢查時，得知病情轉危急需進行手術治療。Henry很擔心，倒是天性樂天的Joey反過來安慰他。

「今天帶了湯水來，是外母大人為你煲的，她就是不相信我也能煲得好…」Henry有點不忿的說。「哈哈，你可知道我家可是一個大定族，而本小姐更是家中最小的千金！你外母大人親自動手給我煲湯，而不是假手印傭姐姐來煲，就知我得寵吧。」Joey進行手術已經超過一星期，今天精神很好呢。「我當然知道…當初跟你回家拜見外父外母兩位大人時，就是洗碗筷，跟你幾位姐夫一起洗，也要一個小時！……對，三姐跟五姐說明天會來探你，明天你不會寂寞就是。」「是嗎？我可不想聽五姐說她奶奶的不是，我倒有點掛念奶奶就是……」「媽媽離開我們也差不多三年了吧…當初在醫院望著消瘦的她……」Henry眼泛淚光的說。Joey慌忙的說「"夫君"是我不好！不要哭出來好不好……」

就在她們打情罵俏的時候，隔鄰的一對夫婦卻顯得過份安靜的說。特別是男的雙手按在膝蓋上，兩臂因為支撐著身體的重量，正在抖震不已。女的吃著丈夫為自己切好的蘋果，一口、一口的送進嘴裡，可是你不能從平白的表情中，看出她是喜是悲、雙目惘然。Joey悄悄的跟Henry說「那位太太最終也敵不過病魔……她要做"那個"手術了，丈夫在知道後，一直也是低著頭，說話比從前更少，就這樣坐下來一言不發……」「或許…他很想要小孩子吧，我看他們比我們年輕，上天也……」「Henry，你有想過要孩子嗎？」Joey突然問Henry「…什…什麼？…孩子嗎？……」「有沒有？」「年輕時曾經想過……可是…生下來問題太多，處理不了…我們不是說了不要小孩嗎？」Henry認真的說。Joey申出舌頭來「哈哈，跟你開玩笑吧了！反正…現在想要也太老了，都快四十歲麻………而且想要，也不可能了！」「……傻瓜，說什麼傻話來！你好好休息就是，再胡思亂想我就…」「你會怎樣？你可要小心我媽不放過你！哈哈哈……」看到Joey再一次笑出來，Henry才放心下來。

「要走了…」「對，要走了…」「明天我會晚上才來，午飯前有會議麻…」「就是跟你說中午不來也可以…」「我放心不下，而且才三個鐵路站而已…」Henry別了Joey，一個人走進鐵路站、上車回公司去。在車上吃東西從來都不對，平常Henry最厭惡乘客吃東西，包裝紙隨處丟的更可惡。可是Joey入院後，Henry為了節省時間，很多時候都會在車上啃麵包。今天在啃麵包的時候，他想起小時候跟媽媽在車廂內聊天的種種，對面坐著一對母子，孩子的名字也叫Henry。

PS.有朋友正在手術後康復中，為你們禱告，早日康復！

記‧造數

記‧造數

有時唔係話科學化既準則唔好，合理地要求數據亦好合理，只係邊個夠膽話自己最合理先？你唔係要出球場前一人一貼紙報數？行行下走左計唔計？中途加入又點計？遊行人數點都唔會係入球場睇波咁入場就計得到既數喇學者大哥！

你話人地造數，好就當造數喇，N年前都知係造數喇！咁又虛耗左啲乜呢？好多人都只係藉大會扯頭纜，有地方計人頭出發，根本就係自由意志叫佢地行，包括我。咁大會話幾多咪幾多囉，同六四一樣，大家唔會覺得咁有啲乜。

學者大哥只係一個線路---有人挾民意自重。老友，好out呀！當香港公民社會民智未開咩，議會好多人都唔信，會信民陣幫我地發聲？等人去救我地呀？你自己講呢堆嘢只係想曲線批佔中，好肉酸。

你點睇？

影‧今天天氣晴

連續數天天晴，對於我這類偽抑鬱症患者，是上佳良藥……

影•兔兒子

你老了，你病了，你不可愛了⋯但我愛你，兔兒子Beige!

是次晚會缺席

六四晚會，我將缺席。我沒有忘記，只是晚會的形式與內容令我困擾。明天返早，晚安！

詩•平行時空是什麼？

平行時空是什麼？

我夢見在另一個時空的自己，

在床上安躺，睡著睡著⋯⋯

我從床上走下來，

天氣是那麼的熱，

薄薄的襯衣，汗流浹背⋯⋯

沐浴吧，將所有東西都沖走，

結上新領帶，結著結著⋯⋯

我從房中走出來，

卓上早點仍冒煙，

滾燙的白粥，一個人吃⋯⋯

那個時空沒有其他人，

只有自己在走著走著⋯⋯

滿街的汽車都沒有司機，

天空特別的晴朗，

空氣特別的甜美。

我問自己孤單嗎？

孤單嗎？我不知道⋯⋯

走累了，就去睡一睡⋯⋯

醒來，我又回到另一個時空，

薄襯衣充滿汗水，

天氣是那麼的熱，

我從房中走出來，

沐浴吧，將所有東西都沖走⋯⋯

平行時空是什麼？

記‧讓

記‧讓

http://sillybillychoi.tumblr.com/post/51736578254

最近覺得自己耐性低得很，比689政府的民望還要低，真的沒有比這更低的了！耐性上班時低。一個拖延、一次失誤、一句無心的話兒，也可以觸感我敏感的神經，加上薄弱的EQ力場一碰就碎，幸好學懂深呼吸、呼氣一招自保，不然已經破口大罵，現在的我"順手做埋"，其他隨便好了。可是上班之後人特別累，谷埋谷埋沒辦法(當然人事愈來愈"好玩"…唉，更累…)。

耐性踩單車時低。為什麼行單車路？為什麼龜速行走？為什麼踩那麼快？為什麼……什麼也可以罵，罵到自己踩單車的興致也消失八八九九！真的犯規的人很多，明明近在咫尺的行人路不走，就是走單車路，警察偏偏只捉拿單車走上行人路！(我明我們犯法，不應罵人不抓其他人，像"小學雞")

昨天下午茶，連母親大人也說我沒耐性！(當然我有伸冤，話題在此不表)有反省問題在那，我想了很久，可能只是一個字﹕讓。如果忍讓一下，世界會變得如何？單車路上的行人，壞習慣也好、趕時間也好，走在單車路上，你踩開一點大家相安無事，記著就算他們不阻你，車速也不能太快，那又有什麼關係呢？忍讓一下，沒事了。小朋友天生如此，上班的時候會心急，可是他們盡了力，急也急不來麻，而且學習需要過程，過程就是等待、等待和等待麻，忍讓一下，沒事了……

真的嗎？讓一下，就沒事？我不知道…不過一試無妨，反正讓一下而已，希望耐性可以高一點，生活愉快一點。

記‧單車旅行

記‧單車旅行

前天到相熟的單車店"吹水"，得知他們最近做了一件很有意義的事---贊助三位青年人，踩單車到歐洲籌款！當然你會說，他們在Banner上有冠名贊助，器材當是宣傳費也不為過，可是能有此善心，我想不應想太多，單純一點男人的浪漫不好嗎？老闆們想賺錢是應該，不過幾年來的交往，我認識的老闆們是義氣仔女，我更傾向相信他們是回饋社會。

跟他們"吹水"少不免談到他們最近的台灣之旅。自己帶車過台灣，由東邊北轉中，上武嶺是必然行程，但可以台中清境小歇，令人羨慕！好玩不在話下，途中上山鬥車輸個馬鼻，足夠這幾個月的本錢"牙擦擦"。有人已經計劃十月再去西藏，有車沿途支援，十多人一團無有怕！

歐洲、台灣環島、入西藏單車旅行，可以說是單車車友們之間的夢想，不論你踩的是公路車、是爬山車(山地車太強國…對不起)、小輪摺車，能夠一天踩踏過百公里，沿途遊山玩水，真正享受四周景物，有如置身天堂。可是費用不菲不在話下，能有悠長假期仍有衝勁玩個飽的香港人，畢竟是小數的。我自己是一例。上年出車率最高，最遠都不過是兩日一夜廣州之旅，一天百多公里而已，由朝踩到晚，食好嘢瞓個靚覺，第二天又匆匆忙忙趕車返香港，跟想像中的單車旅行，差太遠……今年計劃的旅程，不是沒伴就是大陸H7N9，想去也不成，很是失望。退而求其次，想在港玩一天，不是天公不做美，就是工作後力不從心，車也抬不起喇還踩得動？算了吧，呆在家比一切都強，去cafe'看看書的氣力還是有的，車就先放回家。

我得承認我是懶惰了！每天晚上練車已經不可能，放假的藉口也層出不窮。當然客觀事實是，工作的辛勞度有增無減，更期的不配合令人沮喪；同時心態上的轉變，對自己的要求下降卻是主因……所以文章見報之後，我會鞭策自己多踩一點、多練一點，一星期下來總不能六十公里也不夠啊！(即是三天的數，每天來回大埔至沙田多一點…)否則，下一次有機會到外地內地單車旅行便會失威！難，我更加要去，再多的計劃也要去，踩盡佢！

PS.如果老闆能贊助我，就更好！嘩哈哈！

獨善其身

獨善其身

希望獨善其身，很難。
希望不躺在混水之中，不容易。
希望在生活中從容不迫，根本不可能。
那麼⋯⋯
我只好低著頭的接受，笑容掛面的去幹活。

反正，很難，不容易，根本不可能，我也得幹下去。

記•等

其實而家個狀態係：混沌。有好多嘢想透過文字表達出嚟，但係無空間時間去做，精神萎靡，自己見到都驚，腦閉塞⋯⋯當有一兩件事你無辦法提前解決，只有等等等同等既時候，你會安安份份咁等？OMG，希望學識等既藝術⋯⋯冷氣到左，安裝，仍然係一個字：等！

小小說‧神經伴侶007

小小說‧神經伴侶007


Paul & Cat

十二月廿四日晚上你會在那裡？尖東？蘭桂芳？還是在友人的party之中喝個爛醉如泥？「平安夜是耶穌出生的日子嗎？歷史學家已經給我們一個肯定的答案…」「你很煩，可不可以安靜一點？」paul跟cat在急症室大堂等候著。

平安夜的計劃本來是這樣的：paul今天休假，他要替cat交逾期的電話費單，然後再到cat的老家為她取大衣禦寒，據說這個平安夜冷得要命。當然完成以上工作之後，paul要在cat下班之前十五分鐘到公司接她，不然當遲到論。再然後他們就會到友人的party去！去幹什麼？當然是喝個夠，玩一玩，見一見老朋友。

「paul，我的胃很痛……」三杯到肚未幾cat這樣對paul說。「怎麼樣？要回家去嗎？…還是……」「你很煩啊！我只是說胃痛，你煩什麼？要走你自己走…」cat一手推開paul，繼續跟友人玩樂，paul只得乾著急！

過了一會「…痛呀，很痛……」「不成要走了…回家去……」「不行…很痛……」paul二話不說，拖著cat直奔大門，「cat不成了，我們要去醫院…」

在醫院門外嘔吐大作的cat，好像比之前好了一點，在坐滿病人的大堂裡，paul試圖安慰著cat。可是……「還要等多久？…好討厭等，我不想等！」「不等…怎可以這樣呢？要見一見醫生…」「我不要我不要等呀，你有沒有在聽！」cat的脾氣一發不可收拾。忙了一整天的paul心裡著急，不知如果是好，此時cat突然站起來說：「我要走，我不要等，去私家醫院…我要走，痴線，唔等喇我…」一邊走著一邊大叫大嚷的，paul只有跟著追…

「痴線，私家醫院也這麼多人的……」cat在私家醫院內，被大堂的人群迫得脾氣大作…「人多都沒有辦法，醫生總是要看的……」「我不要等，要即刻見醫生…你們每個人都在欺負我的……」cat不顧一切的衝到門外去，paul再追。paul一手抱著cat，cat就像暈倒一樣僕在paul的身上，二人失去平衡的快要倒在地上。paul一手執著身旁的cat，另一手抓著門外的欄杆，好不容易讓兩人安全地坐在地上……

「嫲嫲，他們每一個人都在欺負我，你在那裡？你在那裡啊？…我不要不要不要呀………」cat一邊哭一邊拍打著paul的胸膛，paul無奈的讓cat在發泄情緒，畢竟這樣的情況也不是第一次發生。這是不是每逢佳節倍思親？cat不知不覺睡著了，看一看手錶，差不多五時正，paul的平安夜如是過。(待續)